رباعيات ( أ .. ب .. ب .. أ ) …………………………………… مكنة الدراوه …….

0

بقلم الشاعر/معوض حلمى

انا كنت ماشي ف سكتي
يائس .. ومستني.. الأجل
جرحي الوسيع لم يندمل
قطع .. ورقع .. جتتي

سارح .. بادور .. ع الأمل
لفيت عليه كل الغيطان
دقيت كمان كل البيبان
عديت حدود المحتمل

تحت السما وتحت المطر
حافي .. وبايع .. هدمتي
ياللي انت هديت همتي
الذنب .. بيودي .. لسقر

وأنا لسه زارع زرعتي
بارويها من دمي المسال
ابدرها من عرقي الحلال
فضيت .. عليها .. زلعتي

لما جيت وقت الحصاد
عشان اجيب لي هدمتين
وكام .. لباس ..وكلسونين
بخسولي زرعي في المزاد

مالقيتش .. لقمه .. للعيال
ولا جيبت .. ليهم .. مريله
علشان .. ظروفي .. منيله
بيعت اللي باقي م العزال

معادش باقي غير لحافي
والبرد .. فاتح .. ضلفتين
مين .. يساوي .. الكفتين
مين يواسي فقير وحافي

أنا بيعت شالي وعمتي
ربطت .. بطني .. بمدوره
عشان .. أداري .. الزغوره
الجوع .. بياكل .. معدتي

المدام .. عملت .. مناحه
فاتحه ليا .. 1000 .. فج
حتى دود المش هج
معذوره والله بصراحه

شاطره وعينيها بصيره
مش عارفه تقني البطتين
م الغلب بطت لينا طين
تعمل ايه والإيد قصيره

وليه بقي تشخشخ جيوبي
والله فضيوا وع الحديده
روحي طالعه مش سعيده
بتقولي ملت من عيوبي

الخير .. هجرنا .. واعتذر
بقينا .. غابة .. م الوحوش
باينين بشر لكن هاموش
جحوش ومش لاقيين جزر

يرحم زمانها ستي حمده
واللمه والقلب الطراوه
والمدره ومكنة الدراوه
وكل ناس الكفر حامده

كان غدانا في الأراضي
واحنا .. بنلم .. الدريس
جبنه حادقه وكوم سىريس
والجراب م الغل فاضي

الساقيه غاويه وبيرها نافر
عاشقه المراوي والخضار
وعم .. بهنس .. ع المدار
ويا الجاموسه دار يعافر

كنت باسرح ويا خالي
وويا عمي كتير ساعات
دلوقتي كتروا الشماعات
كل واحد قال ياحالي

كان أدبنا في المدارس
المدرس .. شاف .. ضميره
واللي دارس عبى خيره
ربى جيل لبلاده حارس

كنا .. زي .. ملايكه .. بيض
لما شوفنا زمانكوا توهنا
لف .. راسنا .. لما .. دوخنا
ولاشوفنا إيد بتشد إيد

العدل .. مات .. ويا عمر
معادش بيطرح لينا توت
الجهل عشش في البيوت
حج .. فينا .. واعتمر

كان زمان العدل واحه
معادش قاضي بيناديه
ولاعاد إمام بيوصي بيه
بقينا .. أمه .. مستباحه
…………………………….

اترك رد

لن يتم نشر عنوان بريدك الإلكتروني.